استـــــــرجل

انا النهارده كلامي كان عن الناس الرجالة
للي دايما شايلين مش كل يوم بحاله
والكلام ده مش بس للرجاله
دا في ستات كتير ايدهم شغاله
لو اتسندت عليه تلاقيه دايما معاك
من صباحية ربنا وهو واقف وياك
جنب ابوه وامه بيساعدهم ويساعد معاهم
وعايش بدعوتهم وفايز برضاهم

في وسط اصحابه اسمه الجدع
يفرح معاهم ويداوي اللي اتوجع
ومراته في كل حته بتشكر فيه
جوزي الحنين اللي بتسند عليه
وبص يا خويا انا قلبي بيوجعني
من صاحبي اللي سيبني ولا حتي بيسمعني
بس شاطر اشوفه في الجيم بينفش دراعه
ولو صحبه احتاج له طنشه وباعه

الرجوله يا صحبي مش عضلات هتفرقع
الرجوله لما احتاجلك الاقيك بتستجدع
وانت يا راجل فين حسك مع مراتك؟
مش حسك العالي انا اقصد مساعدتك
قدام التلفزيون وسايب الغلبانة
تأِكل وتلبس وتعمل ميت شغلانة!
قوم ساعدها دا انت وجودك بالدنيا
مراتك ملهاش غيرك ولا عايزه حاجه تانيه
غير راجل بجد حنين عليها
يربي العيال وايده في ايدها

وسوري يا ماما مش جاي الدكتور معاكي
علشان خارج مع اصحابي ومعزوم في كنتاكي!
وياريت تاخدي موصلات وتسبي ليا العربيه
علشان اعدي علي صحبتي دي وقفه مستنية
اصل انا راجل وجدع ودماغ و راسي
ومحبش صحبتي تتبهدل في التكاسي

وبصراحة انا تخرجت وبدور علي شغل ظريف
يدوني لاب توب ويقعدوني في التكيف
لااحب انزل مشواير واتعب نفسي
أقعد في مكتبي باشا اشرب شاي وبيبسي

بقولك ايه يا صاحبي ما تسبني اقول
اتعلم الجدعنة من سيدك الرسول
يبقي غني ويصرف فلوسه علي اصحابه الكتير
ويخش جوه بيته ياكل خبز الشعير
يروح لبيته نفسه يستريح يقوم يخيط جلابيته
ويطمن علي مراته ويحلب الماعز ويصلح جزمته

ويشيل التراب من الحفره الكبيره واصحابه حواليه
وهو بيشيل يغني معاهم والضحكه في عينيه
ويوم القيامة الكل مشغول بنفسه وهو يقول امتي
مش هدخل جنيتي إلا لما تدخلوا معايا علشان تكمل فرحتي

ادي جدعنة النبي للي عايز يمشي وراه
ويعمل زيه في اخلاقه علشان ربه يجيبه معاه —
_________________
منقول من صفحتنا في الفيس بوك
أنــا هكون يوسف وانتي هتكوني مريم ومش هنحب الا ازواجنا