مشكلة

استعرض الموضوع السابق استعرض الموضوع التالي اذهب الى الأسفل

مشكلة

مُساهمة من طرف فريق العفة في الأحد يونيو 09, 2013 2:35 pm

المشكلة :
انا بنت فى اولى كلية عشت حياتى كلها ماليش اى علاقة باى ولد ولا حتى كنت بتكلم معاهم ولا حتى قرايبى وملتزمة وقريبة من ربنا الحمد والشكر لله

لكن اللى حصل ان من 3 سنين تقريبا قبلت اضافة على الفيس بوك لولد كان زميلى فى الدرس مكناش بنتكلم خالص خالص وانا مكنتش اعرف انه اصلا يعرفنى او واخد باله منى لكن كنت اعرف انه ولد كويس
ومؤدب ومتربى بشهادة الناس اللى يعرفوه فقبلت الاضافة لاول مرة

وبعدين حصلت حاجة وبالصدفة بقينا بنتكلم وبقينا بنتكلم علاطول وانا نيتى اتجاهه صافية تماما كنت مش بفرق فى كلامى بينه وبين اى حد بحس لانى مش شايفاه انى بكلم بنت وهوة كمان مكنش حاسس اتجاهى اى حاجة لكن كنا بنتكلم علاطول بس مع العلم ان امى كانت عارفة كل كلاكى تقريبا وعارفة انى بكلمه وبابا كمان وبينوش اى اعتراض وبعد فترة قالى انه بيحبنى وانه معجب بيا انا كنت فى 2 ثانوى فى اخرها او هنتقل السنة اللى وراها وانا قلتله انا احنا لسة صغيرين ودا حب مراهقة وان الحب اللى حاسه اتجاهى دا حب غير حقيقى وفضلنا نتكلم عادى كلام عادى جدا وبنتناقش بكل صراحة فى كل المواضيع لغاية ما جت فترة انا قلتله ان حرام اكلمه وانا هقطع كلام معاك

وهوة تقبل دا احتراما لرايي وبطلنا كلام ورجعنا اتكلمنا تانى لمجرد ان اى حاجة ضرورية خليتنا نفتح حوار تانى زى ما يكون حاجة واتفتحت من جديد وحصل نفس القصة انى ابطل كلام ونرجع تانى حوالى 3 مرات خلال ال 3 سنين دول واخر مرة طول اوى حوالى 6 شهور ماتكلمناش بس انا كنت بفكر فيه دايما ومفتقده اهتمامه وكنت عايزة اطمن عليه بس كنت بمنع نفسى عشان حرام على حسب ما كنت بقول انه خلوة وكدا

وبعدين فى المرة الرابعة اللى رجعنا اتكلمنا فيها لاننا اضطرينا نتكلم عشان نحل مشكلة كانت حاصلة مش بينا بس كانت حاصلة معاه ومع
اختى واتحلت بس المرة دى بردو فضلنا نتكلم وانا قلت ان الحوار كدا مش هينفع نقطع ونرجع كل شوية فاتناقشت مع ماما وقالتلى ممكن تتكلمى مفيش حاجة بس مش كتير وبالحدود اللى انتى حطاها

فاتكلمنا تانى بس المرة دى انا كنت لما بكلمه بحس بمشاعر اتجاهه وانى بحبه وانى كل شوية عايزة ابعت اتطمن عليه وكنت بتضايق لما بيجيب سيرة البنات عنده فى الكلية او انه معجب بواحدة ولا لا انا بالنسبة ليه كنت قريبة جدا لدرجة انه كان بيحكيلى كل حاجة فانا حسيت انى بحبه وبغير عليه حدا لكن فضل اسلوبى معاه زى ما هوة نفس الاسلوب الجد ومححستوش باى حاجة خالص واقنعته انى اخته

لكن انا مكنتش بشوفه كدا وكنت بتالم من جوا بس كنت خايفة لان حرام اى ارتباط غير رسمى واحنا فى اولى كلية وصغيرين فكنت بعمل كدا ومخليا الموضوع ماشى عادى خالص تحت عين ماما وبابا حتى بابا بقى يعرفه كويس وشافه وهما الاتنين بيحبوا بعض اوى

وكل دا انا بيزيد تعلقى بيه بدات احس مؤخرا ان لا مينفعش انا مش صادقة هوة مش اخويا وانا بحبه ومش عايزاه يفكر انى مش بحبه ويحب واحدة تانية ففكرت انى اخليه يشعر بكدا بس انا عمرى ما هقول لحد انى بحبه غير زوجى ودا عهد على نفسى انا بس كنت بفكر اقوله لان من كام يوم كرر انه بيحبى وبيحترمنى تانى فانا فكرت انى اقوله انى متقباه وانه لو جه يتقدملى بعد ما نخلص الكلية ويقدر يشتغل ويفتح بيت انا هوافق عليه عشان ميحسش انى سادة الباب فى وشه وبعدين اسيبه خالص واشيله من عندى على الفيس عشان ماتكونش هناك راجعة زى كل مرة واحتسب عند ربنا

ولا افضل زى ما انا باتكلم باسلوبى الجد دا معاه ومححسوش باى حاجة لغاية الوقت المناسب انا خايفة اقوله انى هقطع معاه تانى اخسره فعشان كدا خايفة ربنا يعلم اد ايه انا تايهة ومشاعرى دى نقية جدا واول مرة فى حياتى احس بيها ومش فاهماها اصلا ولا عارفة مشاعرى دى حرام ولا حلال انا بس مش عايزة اغضب ربنا فانا عندى الاختيارين دول وانا مش عارفة ومحتاجة مساعدة اعمل ايه بس اللى بيقرا رسالى يا ريت يكون او يحاول يتفهمنى ومايردش الرد العادى بتاع الكتب لانى سالت ناس قالولى ماتقوللهوش ولا تحسسيه وسيبيه بس انا كدا هخسره فمقدرتش اعمل كدا

اسفة انى طولت اوى بس كان يهمنى اشرح الموضوع على اد ما اقدر ويا ريت تفيدونى جزاكم الله خيرا

الرد :

السلام عليكم ورحمة الله وبركاته
بداية حبيبتى بنشكرك على ثقتك الغالية بنا ونتمنى من الله نوفق فى حل مشكلتك ونكون سبب فى ارشادك للصواب

حبيبتى الغالية ياللى فرحتينى اوى بقربك من ربنا والتزامك ومحافظتك على نفسك .. وزعلتينى اووووووى انك مع اول اختبار حقيقى ليكى مقدرتيش تصمدى وتقولى .. لأ.. أنتا مسلمة عفيفة هحافظ على قلبى لزوجى وبس.. لأ انا بخاف من ربنا ومش ممكن اعمل حاجة تزعله منى .. لأ انا غالية ومش ممكن حد يقدر يوصل لى إلا بالحلال .. لأ .. انا قوية بإيمانى وعمر ما اى كلام يهزنى ولا يخلينى اتخلى عن مبادئى ..

انتى بتقولى : انا عمرى ما هقول لحد انى بحبه غير زوجى وعاهدتى ربنا على كدة .. هو الحب مجرد انك تقولى بحبك وبس؟! مجرد كلمة؟ .. العهد دة معناه انك تقفلى قلك خاااالص عن اى حب محرم لحد ما ييجى اللى هيكون نصيبك وعندها بس تفتحى قلبك وتبقى كدة وفيتى بعهدك . لكن انتى دلوقتى ماشية فى طريق نقض العهد مع الله وللأسف قربتى من اخر مرحلة فيه وهى انك تصارحيه بحبك .. فارجعى بسرعة بقى واوعى تكملى الطريق دة ..

انتى طبعا عارفة ان اللى بتعمليه دة ..حـــــرام.. لانك وضحتى دة ف كلامك .. ربنا بيقول {وَلا مُتَّخِذَاتِ أَخْدَان} والخدن هو الخليل او الصديق .. يعنى البنت المسلمة لا يجوز لها ان يبقالها خليل او صديق غير زوجها حتى لو كان بعلم اهلها و الناس كلهم لان دة بيغضب ربنا حبيبك منك .. انتى عندك استعداد تغضبى ربنا علشانه؟ طب عندك استعداد تضيعى الجنة ؟ او انك تتحرمى من نعيم فيها مقابل انك تكلمى الشاب دة؟ لما تقابلى الرسول -صلى الله عليه وسلم- على الحوض باذن الله هتبقى مبسوطة من نفسك قدامه ؟ لما تقفى امام الله ويسألك عن علاقتك بالشاب دة هتقولى بابا وماما كانوا عارفين ؟ طيب ما انتِ كنتِ عارفه انه حرام ..

ولازم تطرحى على نفسك الأسئلة دى ..
هو الشخص ده يستحق حبى؟ لو هو بيحبنى فعلا ليه مش خايف عليا من غضب ربنا ؟ طيب ليه مش بيغير عليا من نفسه لانى مُحرمة عليه ؟ لو كنت أخته كان هيقبل ؟ طيب الافعال بتدل على النوايا .. هو بيفكر يشتغل عشان يشيل مسؤلية بيت بيحلم بيه ؟ لو بيحبك بجد هيبدأ من دلوقتى عشانك .. وده شيء واضح ممكن تعرفيه بسهولة اذا كان بيفكر فيكِ بجد ولا لأ .

حبيبتى انتى لسة صغيرة وقدامك حياة لسة هتتعلمى فيها حاجات كتير .. انتى دلوقتى فى فترة مراهقة وكل بنت فى الفترة دى نفسها فى حد يهتم بيها وبتفرح اوى لو حد قالها بحبك .. وبيبقى عندها ميل ان يبقالها حبيب وتتبادل معاه مشاعرها ..دى فطرة ودة مش عيب فيكى دى حاجة ربنا سبحانه وتعالى خلقها فينا .. لكن المشاعر دى فين محلها المناسب؟ ربنا جعل لها مكان واحد مناسب وهو ..الزواج.. دة المكان المناسب ولا مكان سواه عندها بقى الزوجين يطلعوا كل مشاعرهم وحبهم لبعض وربنا يظللهم بالسكينة والطمأنينة ووقتها هتحسى بمعنى الحب الحقيقى لانه هيبقى فى رضا ربنا وطاعته فرق كبيييييييير اوى بين حبك فى معصية و بين حبك فى طاعة .. اما غير كدة فهى علاقات محرمة لا يجوز انك تدخلى نفسك فيها ..

انتى مش عايزة تخسريه وبتتمنى علاقتكم تنتهى بالزواج.. طب انتى عارفة ان الزواج دة رزق من الله .. وما عند الله لا ينال الا بطاعته .. يعنى انتى عايزة تاخدى حاجة من ربنا بمعصيته؟! .. عمر معصيتك لربنا وكلامك مع الشاب دة ما هتوصلك لخير ابدا.. احسبيها معايا كدة وفكرى بعقلك انتى لو استمريتى فى الموضوع دة قدامك طريقين ..الاول ان ربنا يكون مقدر زواجك من الشخص دة وفى الحالة دى بالذنوب والمعاصى اللى عملتوها ربنا مش هيبارك فى زواجكم وهتدخلوا حياتكم الزوجية وانتوا مصابين بشيخوخة مبكرة فى المشاعر والسعادة اللى ربنا كاتبهالكم انتوا استعجلتو واخدتوها بالحرام ..والله اعلم هينتهى الموضوع بإيه والندم اللى هتكونى فيه ساعتها.. اما الطريق التانى ان ربنا ما يقدرش زواجك من الشخص دة وهيبقى كل اللى اخدتيه من لموضوع دة ذنوب وغضب من ربنا عليكى وجرح فى قلبك وعذاب فراق وغيره من مشاكل الحب المحرم التى لا تنتهى لأن ~ من أحب شيئاَ لغير الله عذبه الله به ~ .. يعنى فى كلتا الحالتين انتى الخسرانة خسارة كبيرة فليه انتى تحطى نفسك فى طريقين زى دول؟!
لكن لو حسبتيها بطريقة تانية وقطعتى علاقتك بالشاب دة ربنا هيرضى عنك وهيسعدك ولو هو مُقدر لك تتجوزيه ربنا هيبارك لكم وهيسهل الامور من غير ما تعملى معصيه او تضطرى تكلميه .. و لو مش مُقدر اكيد ربنا هيرزقك بالأحسن .. اللى تحسى معاه فعلا بمتعة الحب الحلال

وأخيراً حبيبتى المسلمة العفيفة الغالية قطعك لعلاقتك مع الشاب دة نهااااائياً دة امر واجب عليكى .. ابعتيله رسالة وقوليله ان دة حرام وانك رجعتى لربنا ومش ممكن تكملى حاجة زى دى وبعدها تعملى له بلوك علشان تقفلى على نفسك الباب ومتدخليش نفسك فى حوارات ونقاشات تانى خالص .. وبكدة انتى هترضى ربنا حبيبك عنك ..اللى لما ترضيه سبحانه هيسعدك وبرضيكى بكل الخير.. اللى لازم متخليش فى قلبك غير حبه وبس ويبقى كل همك رضاه وعندها هتحسى باطمئنان وراحة فى قلبك وهتجيلك السعادة من حيث لا تحتسبى

قومى دلوقتى وصلى ركعتين توبة واسألى ربنا انه يغفرلك كل اللى فات ..

ودى شوية نصايح ليكى علشان تعرفى تبعدى عن طريق الشيطان وتثبتى على التوبة بإذن الله:
1- ادعى ربنا كتير انه يثبتك وتأكدى ان ربنا غفور رحيم ولا يخذل عباده

2- اشغلى نفسك بالطاعات زى الصلاة و قراءة القران والاذكار واكثرى من الاستغفار لانه علاج سحرى لكل المشاكل

3- حاولى تشتركى فى نشاطات خيرية وتدورى على صحبة صالحة تعينك ع الخير او تاخدى كورس .. ومهم جدا انك تشغلى اوقات فراغك عشان متفكريش فيه

4- ادى اوامر لعقلك الباطن بالغاء المحبة دى يعنى كل ما ييجى فى بالك تقولى لنفسك بصوت مسموع الغى إني أخاف الله ومع الايام هيقل تعلقك بيه لحد ما ينتهى

5- اذا كان جواكى مشاعر وعايزة تخرجيها لحد ودا طبيعى عند أى بنت وعشان متضعفيش وتراسي الشخص ده تانى
فانصحك ان تعملى"كشكول"
الكشكول ده فكرة رااااااااااااااااااااااااااائعة
هقلك الكشكول ده اكتبى فيه ايه ...كل لما تبقى جواكى مشاعر طلعيها واكتبها فيه ,وكل لما تبقى عايزة تقولى كلام رومانسى اكتبيه فيه

6-قللى فترة اختلائك بنفسك وحاولى تبقى موجودة باستمرار وسط اهلك علشان الشيطان ما يأثرش عليكى ويضعف عزيمتك

7- دى بقى شوية فيديوهات انصحك تسمعيها هتأثر فيكى جدااا وهتغيرك للأحسن بإذن الله..

http://www.youtube.com/watch?v=352F1exnv3I
http://www.youtube.com/watch?v=eYqUs99KCxY
http://www.youtube.com/watch?v=Oq9h18vbSD8

ونسأل الله أن يشرح صدركِ وأن ييسر أمركِ وأن يجعلكِ من عباد الله الصالحين وأن يزيدكِ من فضله وأن يرزقكِ الزوج الصالح الذي يقر عينكِ وأن يوفقكِ لما يحب ويرضى، وأن يريكِ الحق حقًا ويرزقكِ اتباعه والباطل باطلاً ويرزقكِ اجتنابه وأن يقيكِ الشرور والفتن ما ظهر منها وما بطن.

فريق العفة

فريق العفة
عضوة مجتهد
عضوة  مجتهد

انثى
عدد الرسائل : 149
العمر : 27
نقاط : 8799
تاريخ التسجيل : 05/02/2012

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى